குழந்தைகளுக்கு நாப்கின் மாற்றுவது எப்படி? (Nappy changing)

by **Admin** Thu Feb 28, 2013 11:38 pm

குழந்தைகளுக்கு நாப்கின் மாற்றுவது எப்படி? (Nappy changing)

குழந்தையின் நாப்கினை நாள் ஒன்றுக்கு எத்தனை முறை மாற்ற வேண்டும்?

குழந்தையின் நாப்கின்களை தொடர்ந்து மாற்றுவது முக்கியம். குழந்தையின்
சிறுநீரானது மலத்தில் உள்ள கிருமிகளுடன் சேரும் போது குழந்தையின் தோலில்
எரிச்சலையும் தடிப்புகளையும் உண்டாக்கும். குழந்தைக்கு உணவூட்டிய பிறகு
ஒவ்வொரு முறையும் நாப்கின்னை மாற்றவும் (இரவில் குழந்தை தூக்கத்தில்
இருக்கும் போது ஜாக்கிரதையாக மாற்றவும். இல்லையெனில் குழந்தையின் தூக்கம்
கலைந்து விடும்). குழந்தை மலம், சிறுநீர் கழித்த உடனும் மாற்ற வேண்டும்.
குழந்தைகள் நாள் ஒன்றுக்கு பல முறை மலம் மற்றும் சிறுநீர் கழிப்பர். இதன்
படி நாள் ஒன்றுக்கு 8 லிருந்து 10 முறை வரை நாப்கின் மாற்ற
வேண்டியிருக்கும். நாப்கின் ஈரமாக இருந்தாலும் பல குழந்தைகள் அதைப் பற்றி
கவலைப்படுவதில்லை. ஆகவே குழந்தை அழுதால் தான் நாப்கின் மாற்ற வேண்டும்
என்று நினைக்காதீர்கள். நாப்கின் ஈரமாக இருக்கிறதா என்பதை இரண்டு மணி
நேரத்திற்கு ஒரு முறை உங்கள் சுத்தமான விரலால் தொட்டுப் பாருங்கள்.

நாப்கின் மாற்ற என்ன செய்ய வேண்டும்?

நாப்கின் மாற்றும் போது தேவையானவற்றை முன்னரே அருகில் எடுத்து வைத்துக் கொண்டீர்களா என்பதை ஒரு முறை பார்த்துக் கொள்ளவும்.

•நன்கு சுத்தமான, கழுவி விடக் கூடிய இடமாக பார்த்து நாப்கின் மாற்றவும்.

•சுத்தமான நாப்கின்

•அழுக்கான நாப்கினை அப்புறப்படுத்த ஒரு பை

•துடைப்பதற்கான நல்ல பருத்தித் துணி மற்றும் இதமான வெந்நீர்

•குழந்தையின் தோலில் நாப்கினால் ஏற்பட்ட தடிப்புகள் இருந்தால் தடவ நாப்பி கிரீம்

• குழந்தையின் உடை சேதமடைந்திருந்தால் மாற்ற மாற்று உடை

குழந்தையின் நாப்கின்னை எப்படி மாற்றுவது?

1. உங்கள் கைகளை கழுவிக் கொள்ளவும்.

2. நல்ல சுத்தமான, காய்ந்த, வெதுவெதுப்பாக உள்ள ஓர் இடத்தில் நாப்கினை
மாற்றவும். பாய் பயன்படுத்தலாம். ஆனால் நன்கு சுத்தமான உலர்ந்த டவல் அலல்து
பருத்தி துணியை பயன்படுத்துவது நல்லது.

3. குழந்தையை கீழே வைத்து அழுக்கான நாப்கினை கழற்றவும். ஆனால் நாப்கினை உடனே அப்புறப்படுத்த வேண்டாம்.

4. நாப்கினை பயன்படுத்தி மலம் ஏதாவது ஒட்டிக்கொண்டிருந்தால் நன்கு துடைக்கவும்.

5. குழந்தையின் கணுக்கால்களை பிடித்தவாறு புட்டத்தை உயர்த்தவும்.

6. அழுக்கான நாப்கினை மடித்து அகற்றவும்.

7. வெந்நீரில் நனைக்கப்பட்ட பருத்தித் துணி அல்லது பஞ்சினால் குழந்தையின்
முன்புறத்தை நன்கு துடைக்கவும். பெண் குழந்தை என்றால் எப்போதும்
முன்னிருந்து பின்னாக துடைக்க வேண்டும். இப்படி செய்வதன் மூலம் பெண்
குழந்தையின் பிறப்புறுப்பில் பாக்டீரியாக்கள் சென்று நோய் தொற்றுவது
குறையும்.

8. குழந்தையின் கால்களை உயர்த்தி புட்டத்தை சுத்தம் செய்யவும்.

9. சுத்தமான நாப்கினை அணிவிக்கவும்.

10. நாப்கின் மிகவும் இறுக்கமாக இல்லாமல் சரியாக பொருந்தியிருக்கும் படி அணிவிக்கவும்.

11. அழுக்கான நாப்கினை தனியாக ஒரு பாலிதீன் கவரில் போடவும். பின்னர்
குழந்தைக்கு உடைகள் அணிவிக்கவும். கடைசியாக உங்கள் கைகளை கழுவிக்
கொள்ளவும். அவ்வளவுதான், வேலை முடிந்தது.